Between Spring And Summer

വസന്തകാലമായിരുന്നു
ഞങ്ങൾ ഉന്മാദികൾക്ക്  ചിറകു തന്ന പൂക്കാലം...
കുട്ടികൾ ശലഭങ്ങളായി...
സുഗന്ധം ലഹരി പടർത്തി...
ഞങ്ങളിലേക്ക് പൊഴിഞ്ഞു വീണ ആദ്യ വസന്തം
എന്റെ മുറ്റത്തൊരു പാരിജാതം പൂത്തുലഞ്ഞു.

തിരിച്ചുവരവുകളായിരുന്നു പിന്നിടങ്ങോട്ട്
പറന്നു പോയ കിളികൾ,
നാട് വിട്ട കൂട്ടുകാർ,
കവിത,
പ്രണയിനി,
എവിടേക്കോ ഒഴുകിപ്പോയ പുഴ
അങ്ങിനെയങ്ങിനെ പലതും...

എന്നാൽ
വർഷങ്ങൾക്ക്  മുമ്പ് 
എന്നെ ഉന്മത്തനാക്കിയ
ഒരു ചെമ്പക മരത്തെയോർത്ത്
ആത്മ്മാവിലെവിടെയോ ബാക്കി വെച്ച പൂമണം തേടി,
ഞാൻ,ഞാൻ മാത്രം
വേനലിലേക്ക്  പടിയിറങ്ങി...    

പച്ചക്കലമാൻ

ഞാൻ നിന്റെ കലമാൻ
നീയെന്റെ കണ്ണുകളെ വാഴ്‍ത്തി
എന്റെ കൊമ്പുകൾ തളിർക്കുന്ന കാലത്തെ കുറിച്ചു പാടി
അങ്ങിനെയങ്ങിനെ
ഒരു മാൻ ഒരു പെണ്ണുമായി പ്രണയത്തിലായി!

വന്യമാം ശരൽക്കാലപാത പിന്നിട്ട്‌
നിന്റെ സുഗന്ധത്തിലേക്ക്‌ ഞാൻ കാടിറങ്ങി…

നീ വളർത്തുന്ന കിളികൾ
എന്റെ നെറ്റിയിലെ ചില്ലകളിൽ പെയ്തിറങ്ങി
കാറ്റിൽ പൊഴിയുന്ന ഇലകളിൽ
നീ തണുത്തുറഞ്ഞപ്പോൾ
ഞാൻ നിനക്ക്‌ തീക്കാറ്റായി
പ്രണയത്താൽ നമ്മൾ കാടും വീടും മറന്നു
ആകാശവും കിളികളെയും മറന്നു
നീ മാനായി ഞാൻ മനുഷ്യനായി…!

തണുപ്പുകാലം തീർന്നു
ദൂരെ നിന്നും നിന്റെ കൂട്ടുകാരെത്തി
അവർക്ക്‌ ഞാൻ
നിന്റെ മുറ്റത്ത്‌ വിസ്മയം തീർത്ത പച്ചക്കലമാൻ

നീ അവർക്കിടയിലലിഞ്ഞു പോയി
പിന്നെ നിന്നെ ഞാൻ കണ്ടതേയില്ല
നീലനിലാവിൽ
നിന്റെ കിളിവാതിലിലൂടെ
എന്റെ നേരെ ആരോ നിറയൊഴിക്കുംവരെ.

666

The principles of lust...

Are easy to understand Do what you feel...

Feel until the end The principles of lust...

Are burnt in your mind

Do what you want...

(Enigma)

നിന്റെ ഇടവഴിയിലൂടെ
ഞാനെന്റെ ചെന്നാ‍യ്ക്കളുമായി നടന്നു പോകും
ഉറക്കമുളച്ച് നീ പഠിക്കുന്ന നേരം
എന്റെ ചുവന്ന കണ്ണുകള്‍ നിനക്ക് വ്യക്തം 
കഴുത്തില്‍ പച്ചകുത്തിയ നക്ഷത്രം
നിലാവില്‍ തെളിഞ്ഞു കാണും
 
നീയറിഞ്ഞതേയില്ല,
നിന്റെ ആട്ടിന്‌കുട്ടികളെ കൊന്നുതിന്നുന്നത്-
എന്റെ ചെന്നായ്ക്കളാണെന്ന്....

സംഗീതത്താല്‍ ‌ഞാന്‍‌ നിന്നെ ഭയപ്പെടുത്തും..

നിലാവിലും തണുപ്പിലും
നീ വിറച്ചുകിടന്ന രാത്രികള്‍
നീയറിഞ്ഞതേയില്ല,
നിന്റെ വേദപാഠങ്ങൾ കത്തിയെരിഞ്ഞത്  
 
ഇല പൊഴിഞ്ഞ അത്തിമരങ്ങള്‍‌ക്കിടയിലൂടെ
നീയെന്നിലേക്കൊഴുകി വരികയാണ്
നിശബ്ദമാ‍യ്....

എല്ലാമൊരു ദുഃസ്വപ്നമായിരുന്നെന്ന്
തിരിച്ചറിയും

പക്ഷെ,
നീ ഞട്ടിയുണരുന്നതെപ്പോഴും
എന്റെ കിടയ്ക്കയില്‍‌ നിന്നായിരിക്കും...